TUT LUI-A NGHAKUAI KHAIA INELNA MINISTER-IN HAWNG

Mamit 15th April, 2023 : Fisheries Department hmalakna bakah Forest Department, Tourism, Mizoram Angling Association leh Dapchhuah YMA te'n an thawhpuina-a buatsaih Tut lui-a Nghakuai khaia inelna chu nimin khan Minister, Fisheries Department, LAD, Food, Civil Supplies & Consumer Affairs chuan khuallian niin a hawng a. Vawiin khan a kharna leh lawmman semna neih a ni. 

Nimin hawnna inkhawmah hian Pi Lalremsangpuii, DFDO, Mamit chuan luidung humhalh pawimawhzia Awareness Campaign a nei a. Nihnih chhunga inelna a tel, registration ti zawng zawng hi an vaiin mi 2770 an ni. 

He hunah hian lawmman semna neih niin Sangha man lian ber hi Guwahati atanga Nghakuai khai tur liau liau-a an nupa a lokal Dushyant Bora a ni a. Kg. 10.970 manin lawmman pakhatna a la a, a Sangha man zinga a te ho hi a luiah a chhuah leh a ni. Pahnihna hi Martosh, Thinghlun niin Kg. 9.240 a man a. Lalparmawia Hmar, Mamit-in Kg. 4.600 manin lawmman pathumna a la bawk a ni. Sangha man tam mi pathumte hnenah hian lawmman ₹10000/-, ₹7000/-, ₹5000/- te hlan an ni.

Dapchhuah YMA te'n luidung an humhalh-a Nghakuai chiah runpuiah hian nihnih chhungin Rs. 19,39,000/- a lut a ni.