TUM KHATA BUH LEH SANGHA THAR CHHUAH THEIHNA SERCHHIP ZAWLPUIAH KALPUI A NI

Tumkhata Buh leh Sangha thar chhuah theihna (Paddy-cum- Fish Culture) chu Fisheries Department, Serchhip District ten Zawlpui leh a chheh velah an kalpui leh a, tukin zing karah khan leileta sangha khawi tur thlan bik mi thenkhatte hnenah Sangha chi (Common Carp) pek an ni.

Buh leh Sangha khawi kawp tur hian Department mithiamte chuan a hmunah kalin leilette an enfiah hnuah leileta Sangha khawi tlak ni a an hriat mi 80 hnenah hian ni 6 August, 2016 (Inrinni) khan zirtirna an pe a, he hunah hian Pi Zonuntluangi, DFDO Serchhip chuan kuthnathawktute pawimawhna leh hlutnate sawiin, nasa lehzual zawka tan la turin a fuih.

Leilet neitu, Sangha khawi tura thlan chhuah bikte chu an vanneihzia leh midang entawntlaka tha a an buh leh sangha enkawl turin leh kum dang aia hlawk zawk leh tam zawk thar chhuak turin kuthnthawktute chu duhsakna a hlan a ni.

Nikum lamah NLUP hmangin Paddy-cum-Fish Culture hi hlawhtling takin Zawlpui leh a chhehvelah hian an lo kalpui tawh thu sawiin, Leileta sangha khawi chu hlawk zawk leh tha zawka kan hun leh hmun hman theihna anih zia leh hmun khat atanga buh leh sangha thar chhuah theihna tha tak anih thu a sawi a.

Trainingah hian Fisheries Department mithiamten buh leh sangha khawi kawp hlawk bikna leh that bik ziate leh a enkawl dan uluk takin zirtirna an pe a ni.

National Fisheries Development Board atanga sum hmuh hmangin Paddy-cum- Fish Culture hi kalpui niin Loneitu mi 80 thlan bikte hnenah Sangha chi leh zirtirna pek bakah hian an leilet bial kotlang chu sangha khawina tlak tura siam that nan pawisa fai pawh pek an ni

DIPR