Vawiin November ni 1, 2017 khan Fisheries Department chuan National Fisheries Development Board (NFDB) atanga Skill development hnuaih Sangha khawitu (Fish Farmers) training an buatsaih a, district hrang hrang atangin Sangha khawitute an tel a ni. Sangha khawitute hi Fisheries Department officers ten training an pe a ni.

He training programme hawnna hi Fisheries Minister Pi _ chuan a hmanpui a ni. Minister chuan chhungkua ten hma kan sawn a kan in tun nun theih nan sorkarin tanpui na hrang hrang a sem thin a, sorkar in a tih tur dik dak tiin NLUP te pawh a sem a ni, a hlawhtlin leh tlin loh a chu a dawng tuten kan mawhphurhna a ni ve thung a ni, kan ram sangha a kan intodelh nan leh hma kan sawn theihna turin tuna sangha khawitute leh Department Officials-te hi kan pawimawh dan a in chen reng a, I tang tlang ang u, ringlomite zawk pawhin eizawn nan sangha khawi an hman theih chuan ringtute chuan taimakna nen kan hlawhtling ngei tur a ni a. Tuna training te hi tangkai takin I hmang ang u tiin training hi a hawng a ni.

He training a Central Institute of Freshwater Aquaculture(CIFA) Bhubaneshwar atanga Scientist-te tel te chuan Mizoram sangha tharchhuah hi a leta la pung thei an hriat avangin Mizoram pum tuam rih lovin potential district Kolasib leh Mamit a sangha khawitute an thiamna hmanga rawn puih an tum thu leh Mizoram sangha tharchhuah tih pun nan chuan Sangha chi tha siamchhuah leh kan sangha khawite uluk zawka enkawl a pawimawh thu an sawi uar hle a ni.

Heng Scientist te hmuh danah chuan tuna sangha chi thlahtu Brooder kan neih te hi an chi a tha tawk lova, sangha chi tha siam nan CIFA hmunpui ami Brooder tha hmangin sangha chi siamchhuah nise, Mizoram a sangha tharchhuah hi a pun phah hle an beisei a ni. Scientist te puihna atang hian Potential district Kolasib leh Mamit a dil hectare khat a zau atanga sangha kg 1600 kan tharchhuah thin chu a let 3200/ kg/ha a a pun theih an beisei a ni.