Vawiin Dt. 22 Oct., 2021 ( Zirtawpni) khan Fisheries Department chuan “Luidung nungcha humhalh (Closed Season)” an puan bawhzuiin Director Pu F Vanlallawma hovin Joint Director, Deputy Director leh Officers dangte nen Dialdawk lui a Sangha fuan tur vengtu Lengpui Model Branch YMA te an duty na hmunah an tlawh.
Dt.10th Oct., 2021 atanga Dt.18th Dec., 2021 chhung hi Mizoram sorkar chuan “Luidung nungcha man phalloh hun (Closed Season)” atan a puang a, Closed Season puan bawhzui hian District Office hrang hrangte pawh an huamchhunga nghafuan venghima YMA duty na hmun tlawh turin ruahmanna an siam a ni.
Fisheries Director Pu F. Vanlallawma chuan, YMA member tlawmngai a an huamchhung luidung humhalh a Sangha fuan tur veng tute hnenah lawmthu sawiin, Sorkar in Ni 10 October atanga ni 18 December chhung a Luidung nungcha man phalloh hun a puan chhung hian Luidung nungcha inthlah pung tur man leh an fuan tur tihbuai te, Nghafuan ruh te chu a khap tlat a nih thu a sawi. Heng khapna dan pawi sa lo a tilui te chu The Mizoram Fisheries (Amendment) Act 2016 Section 5 (1) leh (2) hmangin Jail bang zut leh pawisa chawi a hrem tur an nih avangin mi tupawhin Sorkar thupek zawm a pawi sa turin a ngen bawk a ni.
Fisheries Director Pu F. Vanlallawma chuan Kan ram luite kan tih chereu nasat avangin kan luite chu a ruakin a bawlhhlawh em em a. YMA ten an mahni huamchhung luite an humhalh chu, Thangthar lo awm leh zel tur, kan tu leh fate tan a nih thu a sawi a. Kan luidungah nungcha chi hrang hrang zalen tak a an awm a, an lo inthlahpun lehzual theih nan, Luidung nungcha man phalloh hun (Closed season) puan a nih chhung phei hi chuan YMA te chu an huamchhung luite uluk lehzual a venghim turin a ngen a ni.
YMA nghafuan tur veng tute hnenah hian Fisheries Department chuan lawmthu sawina thilpek an pe bawk.
Fisheries Department hian Luidung nungchate inthlah pun hunlai a Luidung nungcha man phalloh hun (Closed Season) a puan chhung hian hmun hrang hrang ah duty insiamin, Luidungte chu uluk takin an vil reng dawn thu sawiin, Sangha fuan turte chu tha tak a an inthlahpun theih nan mitin te thawhpuiah an sawm bawk a ni.
