MIZORAMA FISH FESTIVAL HMASA BER HMANG MEK
9th February, 2017 (MSR) : Mizoram Fish Festival hmasa ber chu nimin khan National Fisheries Development Board (NFDB) buatsaihin tan a ni a, Chief Minister Pu _'n Vanapa Hall-ah a hawng.
He hunah hian Pu _, Minister Home, Agriculture, etc leh NLUP Nodal Minister ni bawk chu khualzahawm a ni a. Fisheries Minister Dr. B.D Chakma, Deputy Chief Whip Pu R.L. _, Parliamentary Secretary Pu _ leh Parliamentary Secretary Lt. Col (Rtd.) ZS. Zuala te an tel bawk.
Chief Minister chuan sangha khawi chu eizawnna atana thil tha a nih avangin Fisheries Department hmalaknain sangha khawitute leh a tui mite in kohkhawm a, tunlai thiamna hmanga sangha hlawk zawk leh hrisel zawk nih theih dan sawihona leh mipui hmaa phochhuahna hun buatsaih chu hlawkthlak taka hman a nih a beisei thu a sawi a. Lui sangha tui leh that zawk zia sangha ei thangte chuan an hriat thu sawinn, kan ram leilung leh tui bakah sik leh sa tha kan neih te hi hmang tangkai a, sangha tui ber chi state pawn pawha thawnchhuah theih tur kan neih theih nan sorkarin hma a la mek a ni a ti.
Pu _ chuan kan fish farmer te pawh midang aia an hnufum bik loh nan hmanraw tha leh tunlai thiamna leh hriatna te inzirtirna neih niin hma lak zel a nih thu a sawi bawk. Chief Minister chuan Sorkar hmalaknain district tinah fish mill nei tura hmalak mek a nih thu a sawi bawk.
Khualzahawm Home Minister Pu _ pawhin thu sawiin, tun hma chuan tur leh bomb/dynamo hmangin sangha te kan man thin a; Changkan lam panin tun hnua Sorkar leh NGO-te thawk hova khawbul lui dung te humhalh a nih tak hnuah, heng humhalh chhungah hi chuan sangha a pun phah ta hle a ni, a ti.
Mizoram Fish Festival hian ni thum chhung, (8th - 10th February, 2017) a awh dawn a. Thupuiah “Fish for All” tih thlan a ni a, Vanapa Hall-a hawnna hun hman zawh hian festival buatsaihna hmun, Transport Department New Building Ground Floor-ah khuallian ho hian Stall hrang hrang te tlawh a ni.
He Festival-ah hian State pawn atangin CIFE, Mumbai; Fisheries College, CAU, Tripura; NGDB; National Angling Federation leh Cold Water Fisheries Research, Bhimtal, Uttarakhand atang te in an tel a, tualchhung atangin PUC Zoology Department; KVK Lengpui; ZOFISHFED; Aquarium Entrepreneur; Association Mizoram; Agriculture Department; Sericulture Department leh KVI Board-te an tel bawk.
Naktukah hian I&PR Conference Hall-ah India hmarchhak state hrang hrang university atanga mithiam kalkhawm te nen tunlai thiamna hmanga sangha khawi leh humhalh dan te sawihona hun neih a ni dawn bawk.
