Vawiin ni 3 September, 2024 chawhma dar 10 khan ICAR-CIFE (Indian Council for acricultural research – central institute of fisheries education) leh Fisheries Department, Govt.of Mizoram tang kawp chuan ni 3 awh tur “Modern Methods of Freshwater Aquaculture” tih thupui hmangin Aizawl District chhunga Fish Farmer thlan chhuah mi 20 te training pekna hun hawn a ni.
He hawnna inkhawmah hian Pu Lalthansanga, Hon’ble Minister, Fisheries Department chuan Khuallian niin hun a hmanpui a, Khuallian chuan sangha khawina in hma a sawn theihna tur leh sangha tam zawk tharchhuahna turin Central leh State Sawrkarin nasa takin hma ala tih sawiin, Sangha khawi chu ram ei leh bara intodelhna atana beiseiawm leh pawimawh tak ani tih a sawi. Central Sawrkar hnuaia Scheme atanga hmalak mekna leh hmalak tur tam tak ala awmthu a sawi a ni. Kan mizo tihdan leh scientific method kaihkawp thiam a sangha tam zawk thar tum turin a fuih. Tanpuina hmu turte uluk taka thlana thawktute pawh nasa zawka tan la a a hmun ngeia tlawhchhuak zel thei turin a fuih a Farmers te pawh endik tlaka hmala turin a fuih bawk. Tin, he training programme hi hmang tangkaia an hriat duhte inthlahrung hauh lova zawt fiah turin a fuih bawk a ni.
Tin, Fisheries Department Commissioner & Secretary Pu H.Lalengmawia IAS in inlawmna thu te sawiin CIFE hi Institution hlun tak, Fisheries thiamna lama hmahruaitu, mi tam tak hnena thiamna petu a ni. Mizoramin Sangha khawina hmuntha a neih atanga 35% chauh hman tangkai a la ni. Hmabak tam tak a la awm, kan tharchhuah pawh kan tihpun angai. Hetiang training programme hian kan tharchhuah tipung ngei se a lawmawm hle ang. Cyclone Remal vanga dil sah leh chhiate siamthat ngai a tam a, Central lamah pawh dil mek a ni. Farmer ten mumal taka kaihhruaina an mamawha tunlai thiamna hmanga tam zawk tharchhuah thei tura tan lakpui hi Department thawktute mawhphurhna ani. Khuallian Pu Chatea hian Fish Farmer te hnenah dil tui thur leh thur lo enna pH kit leh dissolved oxygen enna DO kit te a semchhuak nghal a ni. ICAR-CIFE atanga lokal Principal Scientist Dr.Parimal Sardar hnen atangin Training programme chungchang leh Sangha khawi dan thianghlim leh changkang zawk te ngaihthlak niin Pi Laltleipuii, Director Fisheries Department chuan lawmthu sawiin hun hi a khar a ni.
Ni 3 awh tur Training ah hian ICAR-CIFE, Kolkata atanga lokal Principal Scientist Dr.Parimal, Principal Scientist Dr.T.K.Ghoshal leh Fisheries Department atangin Dr.C.Laltlanmawia, District Programme Manager ten zirtirna an pe ang.
