No.2139/2021-2022
Aizawl 6th September 2021: Vawiin khan Mizoram chhunga luidung nungchate tha zawk leh awmze nei zawka humhalh a nih theihna turin Fisheries Department leh Central YMA ten Dar 1:00pm khan Fisheries Minister Pu K.Lalrinliana pisa-ah Thawhhona Thuthlung ziah a ni.
He Thawhhona Thuthlung hi kum hnih chhung atan a ni a, a tul anga pawhsei a ni ang. He thuthlung hian behchhan pathum a nei a, chungte chu- The Mizoram Fisheries (Amendment) Act, 2016; The Mizoram Fisheries Rules, 2019 leh The Fisheries Conservator Reward Scheme 2019 te a ni. First Party-ah Fisheries Department aiawhin Pu F. Vanlallawma, Director, Department of Fisheries leh Second Party-ah CYMA aiawhin Pu Vanlalruata, President, CYMA ten an ziak a. Witness ah Pi Laltleipuii, Jt. Director, Department of Fisheries, Prof. Lalnuntluanga, General Secretary, CYMA ten an ziak bawk a ni.
Minister Pu K.Lalrinliana chuan thu sawiin, kum tam tak chhung zorama luidung hmung hrang hrangah YMA leh khawtlang ang pawhin humhalh hna hi vawiin ni thlengin lo kalpui a ni tawh a, heng lui humhalh leh a chhunga chengte venhim hna thawk tur hian Fisheries Department a thawk mi 188 te pawhin an phak tawkin an kalpui ve reng a. Amaherawhchu, venhim leh thildang atan work force mamawhna a nasa a, YMA te hi nungcha humhalhna kawngah nasa taka pawl anga hna lo thawk tawh an nih angin sawrkar chuan Thawhhona Thuthlung hi vawiin ni ah a ziahpui ta a ni, a ti a. Minister chuan The Mizoram Fisheries (Amendment) Act, 2016; The Mizoram Fisheries Rules, 2019 leh The Fisheries Conservator Reward Scheme 2019 huam chhunga thawhhona chuan ram ei leh bar intodelh kawngah sulsutu a ni thei a, hun bi nei leh dan leh dun kalphung mumal taka luidung nungchate kan enkawl chuan mimal leh sawrkar pawhin a nei dawn a ni, tiin a sawi bawk a ni.
Thawhhona Thuthlung a inziak angin- luidung nungchate man theihna pekchhuah chungchangah YMA leh Fisheries Department te a tul angin inbiakrawn thin a ni ang a, dan lova luidung nungcha man tute man chhuah kawngah YMA in Department a pui thin ang a, luidung humhalh tha ten YMA hriatpuina thil telin Department-ah lawmman an dil thei ang a, luiding humhalh thate inelna branch level ah YMA in a buatsaih thin dawn a ni.
He hun hi Pu Laldawngliana, Secretary,Fisheries Department chuan a kaihruai a. Pu F.Vanlallawma, Director Fisheries Department leh Pu Vanlalruata, President CYMA ten luidung nungchate humhalh tul zia an sawi a. Pu C.Lalrosanga, Joint Secretary in lawmthu sawiin he hun hi a khar a ni
Video link - https://youtu.be/1VjBqDchY0g
Image Caption
