Aizawl, the 11th August 2021: Vawiin chawhma khan Fisheries Minister K.Lalrinliana chuan Lengpuia Sangha khawina hmunpui, Fish Seed Farm Lengpui a tlawh a. Helai hmuna 'Ovatide' hmanga tharchhuah Sangha chi hralh chhuahna hun a hmanpui nghal a ni.

Fisheries Minister Pu K.Lalrinliana, Fish Farmer ni bawk chuan Sangha chi siam chhuah kawngah tualchhunga sangha khawitute tan lak a ngaih thu a sawi a. Fisheries Department chuan Sangha khawitute zinga Sangha chi tharchhuah tuipuite chu Sawrkar pawhin a duhsak dawn a ni a ti. Tunah hian Mizoram chhunga kumtina Sangha chi lak khawm zinga a zahve aia tam chu pawnlam atanga lakluh a ni a. Hei hian pawn lam mi te hnenah pawisa tamtak kan chhunglut ziah tih a chiang a. Chu chu Sawrkar chuan tha a ti loa Sangha eitur intodelh bakah sangha chi tharchhuah kawngah pawh tan a la mek zel a ni a ti. Minister chuan tualchhung luidunga sangha kan neihte pawh khawi tum mek a nih thu a sawi a. Lunglei lamah chuan Nghaphusen chi hlawhtling takin thar chhoh mek a ni a. Lengpui Sangha chi siamna tuikhuahah te pawh Nghaphusen, Nghahrah leh Lengphar chi khawi pun mek a ni a ti.

Fisheries Department hotute chuan kuthnathawktute hnena Sangha chi an hralh chhuahnaah hian report tawi an pe a. Hripui leng avanga harsatna hrang hrang karah sangha chi indaihlohna ti ziaawm turin Fisheries Department chuan an Fish Seed Farm atangin sangha chi tam zawk tharchhuah tumin an bei mek zel tih an sawi a.

Heng sangha chi an hralhchhuah te hi Indian Major Carps (Rohu & Mrigal) leh Exotic Carp chi khat Grass Carp te an ni a, Hatchery a tui tir ngai chi a vek an ni. Sangha pui (Brooders) tur bik te hi Farm-ah uluk taka a bika chawm leh enkawl an ni a, an tui theih nan damdawi ‘Ovatide’ hmanga chiu niin hatchery-ah tui tir an ni.

Sangha tui lakkhawm liter 230 zet chu a keu tir na hmun ‘Hatching pool’ ah ni 5 chhung dah leh a ni a. Sangha note keu hlim (Spawn) 12,75,000 nos. zet tharchhuah niin a enkawlna dil bik ‘Rearing pond’ a uluk taka enkawl mek an ni. Amaherawhchu sangha note hi an thi awlsam a. Mortality rate a sang em em a, a damchhuak hi an tlem thin avangin sangha note semchhuah theih zat tur hi hriat theih mai a la ni lo a ni.

Pu F.Vanlallawma, Director leh Pi Laltleipuii, Joint Director, Fisheries te bakah Officers dang te leh Lengpui Khawtlang hruaituten Fisheries Minister hi an tawiawm a. Sangha chi hralhchhuahna hunah hian sangha chi leitute chu Sangha dila Sangha chi fimkhur taka thlah dan te uluk taka hriattir an ni bawk a ni.