Champhai dated 28th May 2025: Vawiin khan District Fisheries Development Officer, Champhai leh NFDB-Northeast regional centre Guwahati tangkawp chuan Champhai District-a sangha khawitute tan nithum awh ‘Non-residential training program on BPM on breeding and seed production of common carp using Happa’ training an buatsaih a ni.
He hun hi Pi Lalremsangpuii DFDO, Champhai in kaihhruaiin ‘Common carp’ chungchang training buatsaih a ni chu lawmawm a tih thu a sawi a. Champhai district sik leh sa mil, leilet buh nena khawi pawlh theih sangha a nih avangin Champhai District chu Common Carp khawi tamna district a nih thu a sawi a. Hengte avang hian Champhai district chu sangha a intodelh tur a theihna nei a nih thu tarlangin a chi siam chhuah lamah pawh hlawhtlin tum a tan la zel turin kalkhawmte a fuih a ni.
He hunah hian Dr. Dorothy, MS Executive Officer, NFDB Guwahati chuan training hi a telpuiin, Champhai District a sangha lar tak common carp (Ngha sen) chi thlah dan leh enkawl dan zirtirna a pe a ni.
He training program ah hian chipchiar zawk leh awlsam zawk a Happa len hmanga common carp note dam taka enkawl leh sawngbawl dan inzirtirna pek niin Pi Lalremsangpuii DFDO, Champhai chuan sangha natna (fish disease and management) chungchang zirtirna pein Pu Lalchhuanawma, AFO chuan sanghapui thlan dan leh sawngbawl dan ( Brooders selection and management) zirtirna a pe a. Sangha chiu rai dan leh sangha note enkawl dan (induce breeding and breeding management) leh sangha khawina tui sawngbawl dan ‘Water quality management’ tih thupui hmangin Pu Lalmalsawma, AFO in zirtirna a pe bawk a ni.
Hemi hnu hian Pu F. Laldingliana, Fish seed farm Tlangsam ah Field Demonstration neih niin Sangha len (hatching happa) hmanga sangha note chaw pek dan leh tui enkawl dan zirtirna neih pui a ni.
He training hi sangha khawi tu mi 25 thlan chhuah te tana buatsaih niin training a kal zawng zawng te a thlawnin hatching happa pek vek an nih bakah training certificate hlan an ni.
