CHIEF MINISTER IN FISHERIES DIRECTORATE BUILDING THAR A HAWNG
Vawiin chawhnu khan Mizoram Chief Minister Pu _ chuan New Secretariat Complex-ah State Plan Fund atanga sak, Directorate of Fisheries Department Office Building thar a hawng.
Chief Minister Pu _ chuan New Secretariat Complex ruahman a lo nih chhohdan te sawiin complex chhungah Sawrkar pisa thar tam tak a rawn awm belh zel chu hmasawnna kawngkhat a ni a ti a. Office building thar te chuan achhunga hnathawktute tan phurna thar a pek a, an theihna leh thiamna te bakah an thahnemngaihna thlenga a tihpun a beisei thu a sawi. Sik leh sa duhthusam, a chhunga leilung te thlenga zirchianna atangin Mizoram chu tlai chitin reng thartheihna hmun ni mahse; hlawkpuina tham tharchhuahdan zawnhmuh kawngah erawh tanlak a la ngai nasa hle a ni a ti a. Hmasawn leh than tum reng reng lo, ram leh hnam tan tangkai tum lo leh thahnem ngaih tum lo Department emaw sawrkar hnathawk te chu an rawngbawlsak mipuite hmasawnna daltu an ni a an inbihchian a ngai a ni a ti. Khua leh tui ten sawrkar hmalakna te an hlawkpui zawk nan hlawh neia thawktu te an than harh a ngai a. Sawrkarin hmasawnna kawng hrang hrang a ruahmanna ah te pawh a hlawhtlina turin official-te leh tanpuina dawngtu te chu thiltha zawk inkawhhmuh tawn a an inlawmtawn a ngai a ni a ti.
Chief Minister chuan ei leh bar intodelhna kawnga hmalakna pawimawh tak pakhat chu Sangha vulh/khawi a nih thu a sawi a. Mizoram ah sangha khawi theihna hmun remchang hectare 24000 lai a zau a awm mahse heng ram zau taka 20%-ah chauh sangha khawi a ni tiin tan lak a la ngaih zia a tarlang. Tun dinhmunah Sangha chi tharchhuahna hmun district zawng zawnga neih, sangha dil awmsa thawm that, sangha chi a intodelh leh sangha dil siambelh te chu Mizoram in sangha eitur a lo intodelh theih nan ngaih pawimawh hmasak a ni a ti a. "Chutih rualin mamawhna in a phutmang si loh a Fisheries in hma alo lak vak chuan sum sen thlawnna a ni thei a. Kut hnathawktute mamawhna in Fisheries chu nawr kal thei se - chutiang zelin kuthnathawktute pui thei turin tur in Fisheries Department pawh a lo inrinlawk a ngai a. Fisheries, Agriculture, Horticulture leh eng department te pawh hnathawk thei tura an lo inhmakhua a, inpuahchah lawkna nen anmahni lo inring lawkin kuthnathawktute mamawh reng reng an deliver theih a ngai a ni", a ti.
Thusawitu dang Fisheries Minister Dr. _ chuan kumrei tak chhung mahni puala pisa neilo a an kual hnuah office thar an nei ta tih sawiin an tan chuan mellung thar phunna ni a ni a ti a. Fisheries Department chuan District zawng zawngah phurna thar nen hna an thawk chhun zawm anga; fisheries hnuaia hmalakna in a mamawh zualpui leh hmasawnna ruhrel te pawh siam belh zel tum a ni a ti.
Fisheries Directorate Office Building sak hna chungchanga technical report petu PWD Chief Engineer Pu Lalmuankima Henry in a tarlan dan chuan he building hi Dt 21.10.2012 khan sak tan niin Dt 19.01.2016 khan sak zawk a ni a, a sakna atana senso hi Cheng nuai 499, sing 8 leh sang 8 a ni. Fisheries Directorate Office Building hi chhawng 6 niin a pumpui zau zawng hi Square Metre 1782.80 a ni.
Fisheries Directorate Office Building hawnna programme hi Pu Thlamuana, Secretary, Fisheries in a kaihruai a. Horticulture Minister Pu PC _, NLUP Implementing Board Chairman Pu _, State Planning Board Vice Chairman Pu H.Liansailova, Parliamentary Secretary Pu TT _, ZIDCO Chairman Pu _, Pu _, MLA leh sawrkar mi pawimawh thahnem tak an tel a ni.
WRITTEN BY MALSAWMSANGA MIS, PIO TO CHIEF MINISTER
