Tunhnaia sangha khawina lama hmasawnna thar ber pakhat chu tuifinriat tui al ni lo, khawmualpui chhung tui (freshwater)-a kaikuang khawi hi a ni kan ti thei awm e. Tunhma deuh atang khan kaikuang khawi hi a larin India ram tuifinriat depa state hote chuan sum tarn tak ruh nan an lo hmang thin a, tunah erawh chuan state dangte pawhin an khawi ve theih tur chi Giant Freshwater Prawn (Kaikuang Lian) chu hmun tina khawi theihin a lo awm ta a ni. Kaikuang liante hi bazaar-a a hralhna rate a san bik avangin dil enkawla eizawngte tan a hlawk em em a, englai pawhin kaikuang lian hi kg-ah Rs. 175/- aiin a hniam ngai meuh lo va, hei hi hriain Mizoram Fisheries Department pawhin Central Institute of Fisheries (CIFE), Mumbai nen tangkawpin Mizoram hmun hrang hranga sangha dilah te an khawi chhin mek a, tunah chuan a hlawhtling chho tan mek a ni. Hetiang kaikuang lian chi khawi dan tlangpui chu hetiang hi a ni.
Dil mamawh dan
Kaikuang khawina tur dil chu a len zawngah chuan 0.2-1.0 Ha ni thei sela, a thuk zawngah chuan 1.2-1.5m a tawk a, tui hnar leh luan chhuahna chu nylon lena pin tlat tur a ni. Kaikuang hi vahdarh an hratin a hranga awm an hrat hle a, pipe lian bung emaw, nylon len emaw dah hnawk tur a ni, hengte hi an bihruk hranna hmun tur atan a pawimawh a ni.
Tui boruak
Kaikuangte hian sangha aiin tuia boruak awm, dissolved oxygen an mamawh sang bik a, hemi tipung tur hian tuihnar leh tui luhna chu a kanga siamin dil tui chu khawih chet tir a tha. Hei ai pawha la tha zawk chu dil tui chu thlak thar fo a ni.
Dil buatsaih dan
Dil buatsaih nan chuan a hmasa berah dil mawng chu pho ro phawt tur a ni a, tichuan dil mawng chu let phutin chinai theh tur a ni, tui chu a kang rat thei lo lai a awm pawhin tuia sangha leh rannung dangte chu tihrem vek tur a ni. Chinai hian lei leh tui thur tur a veng a ni. Lei chu a thuk vak loh chuan Hectare 1-ah chinai 500-1000 kg hman tur a ni. Tichuan dil chu tui luh tirin metre chanve vela thuk chimtir tur a ni, tichuan dil lei titha lehzual turin Hectare 1-ah Ar ek ro 250-400 kg emaw bawngek 1000-1500 kg hisapin tuiah chuan dah belh tur a ni, chubakah fertilizer-Single Super Phosphate tui Hectare 1-ah 75 kg leh Urea 25 kg hisapin i tuiah chuan telh belh leh bawk tur a ni. Li mawnga Bawng ek/Ar ek awmte hian li mawng rannungte a ti pung a, hei hi kaikuangte tan chaw tha ber a ni. Chutianga tih hnu chuan kar khat chhung tui chu rial tir rih tur a ni. Tichuan tui rawng pawh a lo hring riai/uk deuh tawh ang a, chumi hnu chuan dilah tui thun belh lehin 1.2 m atanga 1.5 m thlenga thukin chimtir
Kaikuang dah luh
Kaikuang note/chi chawlhkar 3-4 a upate hi dilpuia dah luh theih ruala ngaih a ni a, kaikuang chi chu tuia chhuah hmain a pack-na polythene nen dil tuiah chuan minute 15-20 tal chiah ngei ngei tur a ni. Hei hian an awmna tui leh dil tui vawh zawng inangin a siam a, kaikuangah chuan hei hi a pawimawh em em a ni. Kaikuang pack-na tui leh dil tui thur/al lam pawh in ang sela a tha. Kaikuang hi a hlanga khawi chuan dil Hectare 1-ah kaikuang 50,000 lai a khawi theih a, Intensive culture-ah chuan 1,66,000-2,20,000 lai tui Hectare khatah an khawi bawk a ni. A hlanga khawi pawhin dil tui patek tur vengtu atan Silver carp, Catla leh Grass carp tlem azawng dah tel a tha. Kaikuang hi kum khat chhungin vawi thum te an tui thin a, amaherawhchu kan hriat tawh chinah chuan August thla velah a note (a chi) lak tur a awm thin.
Chaw pek
Kaikuang lian chi hian sa lam leh thlai hnah hring lam pawh an ei duh vek a, dil mawnga rannung leh thlai tawihte hi an ei tamber a ni, amaherawhchu dila kaikuang tam tak kan khawi hian dil chhunga chaw insiam chawpin a daih loh thin avangin chaw siam chawp kan pek belh reng a ngai a ni. Kaikuang khawi hi India ramah a hlawhtlin tawh em avangin a chaw pawh company hrang hrangin tha tak tak an siam tawh a, chutiang chaw(formulated pellet feed) chu kaikuang chawmnan hman ber a ni. Pek tur zat chiah bituk lawk a har a, kan chaw pek an ei zawh dan a zirin chaw chu pek tama pek tlem mai tur a ni. Zing kar leh tlaia chaw pek thin tur a ni, dil hectare 1-a zau, kaikuang chi 50,000 vel khawinaah hian a tirah nitin chaw 5-6 kg pek a, zawi zawia chaw pek pun hret hretin a man hun dawnah chuan nitin chaw 10-20 kg vel lai pek a ngai a ni.
Tui enkawl dan
Kaikaung dilah chuan tui thianghlim a mamawh avangin nitin tui hmun 10-a thena hmun 1 vel tal thlak thar thin a tha, hei hi kaikuang dah hnu thla 1 ral vel atanga tan tur a ni, chu chuan kaikuang inlip(moulting) a ti rang a, an than chak phah thin a ni. Dil tui chu kiu thleng han zen a, kut zung tang hmawr hmuh theih ni sela a tha, tin, kaikuang khawi chhung hian kar hnih danah chinai thi 200-250 kg/Ha theh thin tur a ni bawk, heta tan hian chinai al (Quick lime CaO) aiin chinai thi hman zawk tur a ni.
Than dan leh dam that dan
Kaikuang than that dan hi thil tam takah a innghat a, chungte chu chaw pek danah te, khawi muk dan a zirte an ni. Tha taka dil enkawlah chuan kaikuang hi 100 zela 70 or 80 vel dam khawchhuak tura beisei a ni, an than that dan pawh a inchen lo thei hle bawk, kaikuang pa hi a nu aiin an thang chak zawk a, thlatin l-2cm-in an thang thei a, sangha dang nena khawi pawlha chaw tha pek vak loh pawhin thla 4-ah chuan 11.8cm vela sei niin 25.3gm vela rit te pawh a ni thei a, a hlanga khawia chaw tha hlir peknaah chuan thla 6-ah 18 cm-a sei niin 60 gm a rit niin an puitling(chi thlah thei) a ni. Kaikuang pa chu thla 8-ah22.5 gm an tling thei, a khat tawka hralh theih china lian (50gm) vel man a, hralh thawl pawh a tha. Duhthusama tha a dil enkawlah chuan Hectare khata zauah kaikuang chauh khawi hian kum 1-ah quintal 20 atanga 25 qtl. lai te an thar tawh a ni.
Man khawm dan(Harvesting)
Kaikuang khawiah hian a seng dan hrang hrang a awm thei a, tihdan 1-ah chuan dilah kaikuang te bit takin an khawi a, thla 5-7 velah a lian hmasa lenhrutin an man tan a, chutiang chuan thla tinin a lian hmasa apiang man zelin an hralh thin a, a tawpah chuan dil chu sah kangin a vaiin an man thin a ni. Tihdan dang lehah chuan dilah kaikuangte muk lutuk lo, thang duh tawkin an khawi a, hralh theih rual 50 gm vel an nih hunah an man vek a, a tharin a dang an khawi leh mai thin a ni. Kaikuang man reng reng hi zingah, boruak a daih laiin tih thin tur a ni, kaikuang chu silfai a, vur nen pack hnuah bazaar-ah emaw, processing centre lamah phurh tawh mai tur a ni.
