BUH LEH SANGHA KHAWIPAWLH
(PADDY-CUM-FISH CULTURE)
BUH LEH SANGHA KHAWIPAWLH (PADDY-CUM-FISH CULTURE)
Leilet buh hmuna Sangha khawi hi khawchhak lam ram thenkhat Japan, China, Indonesia leh ram thenkhatah te chuan tunhma atang tawh khan hlawhtling tak leh hlawk takin an lo ti tawh thin a, India ramah pawh tunhnai mai atang khan tih lar tan a ni ve a. Hetianga buh chin leh Sangha khawi kawp nan hian ruahtui tlak tarn tawkna hmun kumkhat chhunga thlaruk emaw tal leilet hmuna tui a awm theihna hmunah a ni tur a ni. Tin, fur laia tuilianin buh hmun a hrut vak vak lohna hmun a ni tur a ni.
Paddy-cum-Fish-Culture India rama an tihdan tlangpui deuhte chu :-
(i) Synchronous system - Buh chin mala Sangha khawi
(ii) Sequential system - Sangha khawi leh buhchin inchhawk
(iii) Interphase, system - Kumkhata buh vawihnih chin naah buhchin vawikhatna leh vawihnihna inkara Sangha khawi.
Mizoram atan chuan dan khatna leh dan hnihna khi hman theih a ni. Kumtluana Sangha khawi thei turin rarnlum zawkah te chuan buhseng laia an awm khawmna tur khua thuk bik siam a ni thin.
A buatsaih dan: Bial tlang feet 11/2 emaw feet hnih emaw a sang, a chung zawl fet khat vela chhah, awitlan tawk (l:l) siam tur a ni. Phairam hmun lum zawkah te chuan bial tlang hrulah khan buh chin lohna tura thuk lai bik siam thin a ni a. Mizoram erawh chu India ram phaite ang a a lum ve loh avangin hetianga Sangha te bihrukna siam hi a ngai ve lova ni.
Buh phun dan: Fur ruahtui tla hmasaah leilet bial te chu buh chin nan buatsaih tur a ni a, a theih hram chuan tui thuk ngam chi buh chin tur a ni. Buh chin tur khan hmun hranah kuitiah hmasak phawt a, phun tham anih hunah phun tur a ni. Buh phun zawhah a tawkin tui kan dah lut anga, Tichuan bialchhung zawng zawng chu Sangha note dah theihna alo ni tawh ang.
Sangha note dah dan: Buh phun hnu ni 15 emaw 20 emaw hnuah chuan buhte chuan zung an lo kaih nghet tana, leilet bial chhung chu Sangha nun theihna tur a tuia lo awm tawk hnuah chuan Common carp note 4-5 inches a sei chu acre khat a 2400 vel hisap in dah tur a ni. Buh phun atanga seng hun thlengin rannung thahna hlo hmanloh hram a tha. Buh chu a lo hmin chuan seng mai tur a ni a, buhseng lai hian bial chhunga tui paihkam deuh angaih thin avangin, Sangha hralh tham te chu hralh mai a tha a, a la te deuhte erawhchu dahthat rih mai tur a ni. Buhseng zawhah hian a theih hram chuan thlasik buhte chin leh nise a tha.
Leilet buh hmun chu kumtluana tui duh anga pek theihna hmun anih chuan thlasik buh ching lovin, buh chin loh chhung December atanga May thla tir lam thlengin Sangha chauh khawiin leilet bial chu hlawk takin kan chhawr thei a ni. Buh seng zawhah chuan Sangha kan khawina tur chu chinai acre khatah 400kg hisapa phul tur a ni a, ni 15 hnuah chuan Bawngek acre khat a 1250kg, Urea 18kg leh SSP 12kg dah leh a, tui dahluh tawh tur a ni. Bawngek leh leitha te hi a rate pangngai in thla tinin dahtheih a tha a, tin, Rice bran leh Oil cake inzata chawhpawlhin Sangha rihzawng let 21/2 vela tamin nitin chaw pek bawk tur a ni. Hetiang taka tih chuan Sangha lian tak tak hralh tur a lo awm tawh a ni. Buh chin loh chhung zawnga a thlawna dah mai mai aiah Sangha thar theih anih avangin a hlawkin a zawng chhang tlak hle a ni.
A hlawk dan: India rama Sangha khawi zirna hmunpui ber pakhat Barrackpore, W.Bengal a mithiamten an enchliinna a an hmuh dan chuan leilet buh hmun hectare khatah Major carp note 6000 dahna an thla sawm chhungin 700kg an thar thei a ni.
Buhchin leh Sangha khawipawlh hi Mizoram ah chuan Champhai zawl buh hmunah kum 1981 khan tihtan a ni a, a thatdan leh hlawkdan hmu in miten an intih hmuh zel a, kum 1984-1985 tawp lamah chuan Champhai, Ruantlang, Zote leh Hmunhmeltha a loneituten an leilet acre 400 lai a zau chu buhchin leh Sangha khawipawlh nan an hmang ta a ni. Buhhmuna Sangha tharchhuahte chu tamtak nilemlo mahse buh chauh chin ai chuan nasa takin a hlawk zawk tih hmuhchhuah ani. Champhai Agriculture huam chhungah ngawt pawh leilet buhhmun acre 2140 vel awma ngaih a ni a, North Vanlaiphai ah pawh leilet acre 547 vel a awm bawk a ni. Heng leilet kan sawitakte hi a tarn zawkte chu buh thar kiam chuang lovin Sangha khawi nen tih pawlh theih a ni. Champhaia loneitu thenkhatten an hmuh danin Sangha khawi leh buhchin pawlh hian an buh thar chu zaah 16 atanga 36 zelin a pung a ni. Champhai khi hmun vawt tak a nih avangin Major carp in a ngeih lova. Chuvangin, buhhmuna khawite chu Common carp vek a ni tur a ni.
Buhchin leh Sangha khawipawIh(Paddy-cum-Fish Culture) hlawkna :-
(1) Amah ngawta chin aiih Sangha nen a khawipawlh hi buhin a ngeih zawk. Common carp te hi lei nawr reng chi an ni a, buh hmun kan thlova, hlobet kan paiha, lei kan hai phut buhin an ngeih ang bawkin sanghaten hlobet leh buhbulte an nawr a, lei an tihdanglam kha buh in a that phah a, a thar hlawk zawk.
(2) Buh kung tichhe tu rannungte Sangha in an ei.
(3) Sangha ek te lei titha tu an ni.
(4) Tui a thuk lova, Ni eng an hmu tha a, limawng thlengin nizungin a chhun a, dil pangngai aiin Sangha a thang chak bik.
(5) Senso a tlem:- Leilet buh hmun nei tamtak te hian an buhhmunte chu an thlo thin a, Common carp Sangha nena chin pawlh hian thlawh a ngai meuh lo. Kan sawi tawh ang khan Common carp Sangha te hi hnim bul leh buhbul nawr rengchi an ni a, buh kara hnim tak tak te chu an ei emaw, an nawrphawng emaw a, chuvangin loneituten kumdanga hnim an thlawhfai thin ang kha an sanghate an thlawhfai sak ang a lo ni a, hlothlawh nana tha leh sum an sen thin kha chhungkaw mamawh kawngdangah a hmantheih ta a ni. Hei bakah hian kum tina lei an rihphut thin kha a ngai tawh lova, buh hmuna tui awm reng anih avangin tui a nem reng a, buh phun leh hunah a phun leh theih nghal mai a ni.
(6) Sangha chawm a hautak lo zawk:- Buh kungah te chuan rannung chi hrang hrang fu in ruiah an tla a, chung rannung te chu Sangha te tan chaw tha tak an ni. Hei bakah hian buh alo puitling huna buhfang tla leh a seng laia mihringin kan tih tilhte chu Sanghate tan chaw tui tak leh tha tak an ni bawk. Hengte avang hian kan tuikhuaha Sanghate kan chawm ang em in chawmlo mah ila buh kara sanghate chu an thangtha in an thau duh tho ani.
Paddy-cum-Fish Culture hi leilet hmun nei tha te tan chuan, kumkhat chhunga thil chi hnih buh leh Sangha tharchhuah theihna hmun a ni a, a hlawk in a remchang hle a ni.
