Mizoram Fish Festival 2023
…
Ni hnih awh tur Mizoram Fish Festival 2023 chu vawiin chawhnu dar 1:00 khan Aijal Club Park ah hawn a ni.
A hawnna hun hi Pu F.Vanlallawma, Director, Fisheries Department in kaihruaiin Pu C.Lalzahngoa, Secretary, Fisheries Department in Khuallian niin he hun hi a hmanpui.
Khuallian Pu C.Lalzahngoa chuan National Fisheries Development Board (NFDB) ten PMMSY sum hmanga Mizorama Fish Festival huaihawt anih theihna tura an hmalak naah lawmawm a tih thu a sawi a. Tualchhung dil sangha khawitute leh sangha kaihhnawih thila sumdawng thin te tan inphochhuahna hun tha tak buatsaih anih theih avangin a lawmawm a tih thu a sawi bawk. Tin, tualchhung tharchhuah sangha te a lo pun zel thu leh Mizo mipuite pawhin kan ngaihhlut deuh deuh thu te sawiin mizo mipuite chu ngaihlu deuh deuh turin a sawm a, mahni ram tharchhuah ngei kan inhlutpui hian kan inpuitawn ani tih a sawi a, sa hrisel sangha eitam deuh deuh a tulzia a sawi bawk. Tin October ni 10 atanga December ni 18 thleng hian Mizorama sanghate an fuan hunlai (an inthlahpun hunlai) anih avangin Fisheries Department in Closed Season (sangha man phalloh hun) a puang a, he closed season hi Mizo mipuiten ngai pawimawha luia sangha leh luidung nungchangte manlo turin a ngen bawk a ni.
Thusawitu dang Pi Laltleipuii, Joint Director chuan Fish Festival hi Mizoram ah tum hnihna atana neih theih ani chu lawmawm a tih thu a sawi a. Fisheries Department in Central Scheme hrang hranga hma a lak mek te sawifiahin Mizoram ah pawh sangha dil hectare 5000 chuang lai a awm tawh thu te, District 11 a District Office te kaltlanga Fisheries Department in sangha khawitute tana theihtawp chhuaha hma an lak mek thu a sawi a. Sangha dil atanga sangha tharchhuah tihpun mai nilovin luidung humhalh kawnga Department in Central YMA te nena hma a lak mek nate sawiin kan luidung ah te pawh sangha tharchhuah a pun ngei beisei anih thu a sawi.
A hawnna programme ah hian Mizoram aiawha Regional leh National level a Best Fish Farmers Award lo dawng tawhtu mi pali Pu Hmangaihthanga, Serchhip kum 2018, Pu F.Laldingliana, Champhai Kahrawt kum 2019, Pu Lalzamliana, Buhchang kum 2022, Pu Lalthanliana, Kolasib kum 2023 te hnenah lawmpuina thuziak leh pawisa fai hlan a ni.
He Festival ah hian stall 10 awmin mizo tharchhuah sangha tharlam leh bawma khawi chi sangha te Mizoram chhung ngeia siamchhuahte bakah sangha kaihhnawih thildangte phochhuaha zawrh a ni.
He Fish Festival hian Ni 17 November, 2023 thleng a awh ang.
